ភ្នំពេញ៖ ក្រសួងសុខាភិបាលបានច្រានចោលនូវការផ្សាយថាមានកុមារជាង ២០នាក់បានស្លាប់ដោយសារផឹកភេសជ្ជៈគ្រឿងកំប៉ុងច្រើនពេក។ ក្រសួងសុខាភិបាលអះអាងថា ព័ត៌មាននេះជាព័ត៌មានក្លែងក្លាយ។
ក្រសួងសុខាភិបាល បានស្នើឱ្យអាជ្ញាធរមានសមត្ថកិច្ច ចាត់វិធានការតាមផ្លូវច្បាប់ចំពោះការផ្សព្វផ្សាយព័ត៌មានមិនពិតមួយនេះ។
ក្រសួងព្រមានបែបនេះក្រោយពីមានការផ្សព្វផ្សាយថា មានករណីស្លាប់កុមារជាង ២០នាក់ក្នុងមួយថ្ងៃនៅកម្ពុជា ព្រោះទទួលទានភេសជ្ជៈគ្រឿងកំប៉ុងច្រើនពេក។
ទោះបីក្រសួងបដិសេធព័ត៌មាននេះក្តី តែការសិក្សាពីក្រុមអ្នកជំនាញ ការទទួលទានគ្រឿងកំប៉ុងដែលមានជាតិស្ករច្រើនអាចបង្កហានិភ័យដល់សុខភាពមនុស្សធ្ងន់ធ្ងរ ខណៈកន្លងមកមានករណីក្មេងប្រុសម្នាក់នៅខេត្តព្រៃវែងបានស្លាប់ក្រោយពីផឹកគ្រឿងកំប៉ុងអស់រយៈពេល ៤ខែដែលធ្វើឱ្យខ្សោចតម្រងនោម និងអស់ក្រលៀនតម្រូវឱ្យលាងឈាមទើបរក្សាជីវិតបាន៕
